हालै सम्पन्न निर्वाचनपछि वामपन्थी तथा कम्युनिष्ट पार्टीहरूभित्र आत्मसमीक्षा र पुनर्गठनको बहस तीव्र बनेको छ। विभिन्न वामपन्थी नेताहरूले संयुक्त अपिल जारी गर्दै पार्टी नेतृत्व, कार्यशैली र जनसम्बन्ध कमजोर भएको निष्कर्ष सार्वजनिक गरेका छन्।
अपिलमा उल्लेख गरिएअनुसार निर्वाचन परिणामले वाम आन्दोलनप्रति जनताको भरोसा घट्दै गएको संकेत दिएको छ। लामो समयदेखि सत्ता र संगठनमा रहे पनि जनताका आधारभूत मुद्दा सम्बोधन गर्न नसक्नु, विचारभन्दा व्यक्तिवाद हाबी हुनु र आन्तरिक लोकतन्त्र कमजोर हुनु प्रमुख कारणका रूपमा औंल्याइएको छ।
नेताहरूले पार्टीभित्र गुटबन्दी, व्यक्तिगत स्वार्थ र अवसरवाद बढ्दै गएको स्वीकार गर्दै यसले वाम आन्दोलनको विश्वसनीयतामा गम्भीर असर पारेको बताएका छन्। जनताको दैनिक जीवनसँग जोडिएका मुद्दामा स्पष्ट नीति र प्रभावकारी कार्यक्रम नआएकाले मतदाता निराश भएको पनि अपिलमा उल्लेख छ।
साथै, वामपन्थी शक्तिहरूबीच एकता अपरिहार्य रहेको निष्कर्ष निकाल्दै नेताहरूले साझा विचार, कार्यक्रम र नेतृत्व विकासमा जोड दिएका छन्। उनीहरूले पुरानो कार्यशैली त्यागेर नयाँ पुस्तालाई अवसर दिनुपर्ने र पार्टीलाई जनमुखी बनाउनुपर्ने आवश्यकता औंल्याएका छन्।
अपिलमा आगामी दिनमा वामपन्थी आन्दोलनलाई पुनः सशक्त बनाउन एकता, रूपान्तरण र सुदृढीकरण अभियान सञ्चालन गरिने उल्लेख गरिएको छ। साथै, राष्ट्रिय हित, लोकतन्त्र र समाजवादको लक्ष्य प्राप्तिका लागि सबै वामपन्थी शक्तिहरूलाई एकताबद्ध हुन आह्वान गरिएको छ।
यस संयुक्त अपिलमा विभिन्न कम्युनिष्ट नेताहरूले हस्ताक्षर गरेका छन्। उनीहरूले विगतका कमजोरीबाट सिक्दै अब नयाँ ढंगले अघि बढ्ने प्रतिबद्धता जनाएका छन्।
झापामा भएको समीक्षा बैठकमा स्वतन्त्र वामपन्थी नेता नरेश खरेल, नेपाली कम्युनिस्ट पार्टीबाट झलक सिंह दर्लामी, रञ्जित तामाङ, ज्योति सिंह दर्लामी, पुष्प पोखरेल, प्रगतिशील लोकतान्त्रिक पार्टीका लक्ष्मी देवी न्यौपाने सरु, नेकपा एमालेबाट रबिन कोइराला , गणेश पोख्रेल, नेकपा संयुक्तबाट निलमणि बराल र नेकपा माओवादीबाट अर्जुन पाण्डेले हस्ताक्षर गरी संयुक्त विज्ञप्ति निकालेका छन्।
